முற்றுப் பெறாதது சாத்தானின் தூதே ...

கஸ்தூரியை சுமந்தவர்கள் குப்ரிய சாக்கடையில் 

சுகந்தம் தேடி புறண்டதனால் தூய இலட்சியங்கள் நாறிப்போக 

இரத்தமும் சதைகளும் உணர்வுகளும் உரிமைகளும் 

அற்பமென்றாகி அவல ஊர்வலங்கள் இந்த உம்மாவின் 

வீதிகளில் வலம் வரத் தொடங்கின !

கலங்கரை விளக்குகள் குட்டிச் சுவர்களுக்குள் 

சுயநல வாழ்க்கை தொடரக் கற்றுக்கொண்டதால் தான் 

அதற்காகவே காத்திருந்த ஓநாய்கள் 

சாவகாசமாக முற்றுகையிட்டு எம் நிலங்களிலேயே 

முகாமிட்டு விஷப்பற்களை பதிக்கத் தொடங்கின !

இன்று ஜாஹிலீய சத்துருக்களின் அரசியல் சதுரங்கத்தில் 

நாம் ஒன்றும் 'கிங் மேக்கர்கள் 'அல்ல , 'கிங் ஜோக்கர்கள்'!

அல்லாஹ்வின் அமானிதத்தை அலட்சியம் செய்துவிட்டு 

அசத்திய' பொலிடிக்ஸில்'  நவீனம் காண்கிறோம் ! இது 

அநாகரீக மேடையில் நாகரிக நடனமாம் !

'ஹராத்தில் ' மூழ்கி 'ஹலாலை ' தேடுவது 

அற்புதக்கலை என்பது  அல்லாஹ்வுக்கே(சுப) தெரியாதது !!!

அவனின் தூதர் (ஸல் ) அவர்களுக்கோ புரியாதது !!!

அதிசயமான இந்த வஹிப்பிரதி, மக்கியா ? மதனியா?

'ஹிராவில்' தொடங்கி' 'ஹஜ்ஜதுல்விதாவரை'' இல்லவே இல்லை.

சத்தியத்தின் தூதுக்குத்தான் பூர்த்தி நடந்து விட்டதே !! ஆனால் 

சாத்தானின் தூதுக்குத் தான் பூர்த்தியே இல்லையே !

ஒருவேளை இந்த நூற்றாண்டின்? சதிப்பிரதி 

'சியோனிச 'அருளால் 'பென்டகனில் ' இறங்கி 

'வைட் ஹவுஸ் ' மொழியால் அரேபியா  நுழைந்திருக்கலாம் !!